Tras alcanzar un destacado posto como un dos equipos de fútbol con maior presencia en redes sociais, segundo o informe de CIES Football Observatory, o RC Celta continúa o seu ascenso no universo en liña. Cunha impresionante cifra de 10 millóns de seguidores en todas as súas contas oficiais, o club consolídase como o décimo equipo de LaLiga con máis followers, demostrando a sólida conexión global que estableceu cos celtistas e o seu afianzamento como referente dixital no mundo do esférico.
Cunha presenza impoñente en plataformas como Facebook (con case 2,5 millóns de seguidores), Twitter (con máis de 550.000 seguidores), Youtube (onde acumula 60.000 de seguidores), Instagram (con 450.000 seguidores) e LinkedIn (con 10.000), o RC Celta non só conquistou o mercado nacional, senón que tamén se expandiu de maneira significativa polo mundo a través dun favorable e prometedor plan de redes. Destaca a súa presenza no mercado asiático a través da plataforma Weibo, onde acumula preto de 400.000 seguidores, e a súa estratexia de internacionalización en Estados Unidos, Canadá e México, con 7.000 celtistas en Snapchat.
Pero sen lugar a dúbida, o verdadeiro fenómeno vívese en TikTok, onde o RC Celta posiciónase como o sétimo equipo español con máis seguidores, alcanzando a asombrosa cifra de 5,7 millóns de celtistas. Durante a tempada 23/24, o club experimentou unha subida excepcional nesta plataforma, sumando 1,9 millóns de novos seguidores e situándose como o noveno equipo de LaLiga co maior crecemento.
En cómputo global, o RC Celta conquistou case 2,5 millóns de novos followers en todas as súas plataformas oficiais, o que lle valeu ese décimo posto de equipos de LaLiga con máis seguidores. Esta extraordinaria progresión, que inclúe contas integramente en galego como “Xuntos” e novas incorporacións como WhatsApp, plataforma que se inaugurou hai un mes e que xa conta con 60.000 seguidores, reflicte o compromiso do RC Celta coas raíces do club, co crecemento do fútbol na nube e con todos os celtistas do mundo.
Con todo iso, e como xesto de agradecemento, o RC Celta quere celebrar a impresionante cifra de 10 millóns de seguidores cun emocionante sorteo: 10 días, 10 premios, coa oportunidade de gañar un agasallo especial cada día. Más información nas redes sociais do club.
Grazas, celtistas!
