Monólogo do filial, moi superior durante todo o encontro e con dous goles anulados (0-1)
Frustrante derrota do Celta B, a primeira da tempada, ante un Astorga que levou o tres puntos de Barreiro no seu único remate entre o tres paus. Os celestes foron moi superiores e ao longo de todo o partido gozaron de suficientes oportunidades como para lograr a remontada, incluidos dous goles anulados por fora de xogo. A falta de definición e o traveseiro evitaron que chegase o gol céltico. A falta de 5 minutos para o final a expulsión con vermella directa de Pape arrefriou as rabexadas finais do choque.
O Celta B foi dono e señor do balón nun primeiro tempo no que, con todo, adiantouse o Astorga no marcador a pesar das súas escasas aproximacións á área viguesa. As longas posesións dos celestes finalizaban sen remates perigosos e finalmente o cadro visitante, en practicamente a súa única ocasión, golpeou primeiro.
Corría o minuto 26 cando Lago avanzou por banda até a liña de fondo e asistiu a Bandeira na área para que este rematase de primeiras ao fondo da portaría olívica. A partir do tanto leonés e até o descanso o partido converteuse nun monólogo céltico cun bo puñado de ocasións para empatar que non frutificaron.
No segundo tempo mantívose a dinámica dos 45 minutos anteriores: posesión celeste, continuas chegadas á área leonesa e un Astorga encerrado atrás. Nin a sorte nin a definición acompañaban ao Celta B, frustrado ante a súa dificultade para perforar a portaría rival. Unha das mellores oportunidades para os de Torres Gómez chegou no minuto 56, cunha falta maxistralmente executada por Rubén Ramiro a pesar de que o balón golpeou no traveseiro e marchouse fóra.
O cronómetro avanzaba e o filial non recibía a merecida recompensa á súa superioridade, a súa entrega e o seu incesante dominio. A expulsión de Pape no minuto 85 puxo o tramo final do partido de face para o Astorga. Primeiro gol en contra e primeira derrota da tempada para un Celta B que a pesar do resultado volveu ofrecer un partido serio e traballado no que só fallou a puntaría.
FICHA TÉCNICA
0-CELTA B: Iván, Kevin, De Amo (Brais Méndez, min.70), Goldar, Samu, Borja Fernández, Luis Rioja, Julio Delgado (Javi Que, min.70), Pape, Rubén Ramiro e Borja Iglesias.
1-ASTORGA: Riki, Manu, Juanra, Uña, Víctor, Ivi (Pevida, min.62), Porfirio, Víctor Andrés (Fa, min.52), Roberto Puente, David Bandera e Lago (Cristian, min.73).
Goles: Bandera, min.26, 0-1.
Árbitro: Carbajales Gómez, do comité asturiano. Amonestou polo Celta a Julio Delgado e polo Astorga a Uña, Víctor Andrés, Juanra, Fa e Pevida. Expulsou con vermello directo a Pape.
Campo: Barreiro. 800 espectadores.
