O canteirán Miguel Rodríguez debutou hai pouco máis dun mes coa Selección Española Sub-19, e fíxoo de xeito inmellorable, anotando un gol na vitoria ante México. O dianteiro celeste volve con este combinado nacional para dous partidos ante Israel que se disputarán a finais do presente mes.
Miguel Rodríguez forma parte da convocatoria para os encontros que a Selección Sub-19 disputará o día 26 de outubro ás 16.00 horas e o día 28 dese mesmo mes ás 11.00 horas ante o combinado israelí.
O atacante do Celta B é un fixo nas categorías inferiores de España desde a Sub-16, sempre cun gran protagonismo goleador. De feito, nas súas dúas anteriores participacións coa Sub-19, as primeiras nesta categoría, anotou en ambos encontros.
