O partido chegou ao descanso con empate no marcador. No segundo tempo os celestes golearon (1-4)
O Celta foi de menos a máis no amigable disputado este mércores ante o Racing Club Ferrol na Malata. Os verdibrancos plantaron cara aos célticos no primeiro tempo, adiantándose no marcador e mantendo daquela o empate a uns no marcador até o descanso. Os de Berizzo melloraron notablemente a súa imaxe na segunda parte, na que remontaron o choque con goles de Guidetti, Sergi Gómez e Aspas.
O partido arrincou con ritmo sosegado e o primeiros dez minutos transcorreron sen ocasións de gol. O tanto local, obra de Vidal, chegou inesperadamente, á contra, cando o Celta comezaba a tomar o pulso ao encontro e a inquietar a área rival. Corría o minuto 22 e os vigueses non tardaron en reaccionar con Nolito asinando un gran gol á saída dun saque de esquina. O descanso chegou coas forzas niveladas e un Racing que perserveraba con perigo na procura da segunda diana departamental.
Tras a continuación Berizzo introduciu cambios. Néstor substituíu a Sergio baixo paus e Fontàs, Augusto e Orellana entraron por Cabral, Borja Fernández e Nolito. Os celestes arrincaron a segunda parte con mentalidade renovada e enseguida fixéronse donos e señores do balón. Tras varias advertencias o Celta por fin adiantouse no marcador no minuto 60 cun tanto do dianteiro sueco John Guidetti. O cadro olívico, moito máis elevado que no primeiro tempo, mantivo a súa superioridade e redondeou a vitoria cun disparo cruzado de Sergi Gómez que terminou no fondo da portaría ferrolá. O defensor catalán ocupou o lateral dereito durante a segunda parte e Radoja situouse no centro da zaga. O triunfo céltico redondeouse na recta final co definitivo 1-4, marcado por Iago Aspas.
FICHA TÉCNICA
1-Racing Ferrol: Cabanelas, Pascual, Maceira, Víctor Vázquez, Golo, Borja, Diego Vela, Carlos López, Jaime Vidal, Peláez e Juampa.
3-RC Celta: Sergio (Néstor, min.46), Hugo Mallo (Pablo Hernández, min.63), Cabral (Fontàs, min.46), Sergi Gómez, Planas, Borja Fernández (Augusto, min.46), Radoja, Señé (Iago Aspas, min.70), Bongonda, Nolito (Orellana, min.46) e Guidetti.
Goles: Vidal, min.22, 1-0; Nolito, min.26, 1-1; Guidetti, min.60, 1-2; Sergi Gómez, min.68, 1-3; Iago Aspas, min.82, 1-4.
Árbitro: Martín Santos. Amonestou a Guidetti.
Campo: A Malata.
Observacións: Drazic, convocado, non pudo participar no partido por unhas molestias gástricas.
