Berizzo recuperará a todos os seus efectivos nos primeiros días desta semana
Os internacionais celestes preparan o seu regreso á disciplina céltica na semana na que os de Berizzo mídense ao líder de Primeira División, o FC Barcelona. Onte domingo os chilenos Orellana e Pablo Hernández e o danés Krohn-Dehli despedíronse das súas seleccións, mentres que hoxe tocaralles aos canteiráns Rubén e Jonny pechar a súa participación coa Sub-21 española cun amigable ante Bielorrusia en León e a Radoja coa Sub-21 serbia ante Italia en Benevento (Italia).. Pola súa banda Madinda, lesionado, xa estará este luns na Madroa a pesar de que estaba convocado para o partido que Gabón disputa esta tarde ante a absoluta de Bielorrusia.
Chile
Pablo Hernández foi titular e disputou os 90 minutos no partido que a selección chilena xogou este domingo ante Brasil en Londres. Os de Sampaoli perderon pola mínima, 1-0, ante a canarinha, un amigable que Fabián Orellana presenciou desde o banco de suplentes.
Dinamarca
Krohn-Dehli destacou como titular no partido de Dinamarca ante Francia, a pesar de que o conxunto nórdico terminou perdendo 2-0. O centrocampista celeste mantívose 86 minutos sobre o terreo de xogo do estadio Geoffroy-Guichard de Saint Etienne (Francia).
