Será intervido cirurxicamente nos próximos días polo doutor García Cota
A desgraza volveuse a cebar co central do Real Club Celta Samuel Llorca, quen se retirou do adestramento vespertino do martes cunha molestia no seu xeonllo dereito. A resonancia realizada hoxe no Hospital Vithas Nuestra Señora de Fátima desvelou o alcance da lesión: Rotura total do ligamento cruzado anterior e unha pequena rotura do menisco interno.
Samuel será intervido durante os próximos días no Hospital Vithas Nuestra Señora de Fátima polo xefe dos servizos médicos do club, Juan José García Cota, quen xa operou ao defensa céltico da grave lesión que sufriu a pasada tempada no xeonllo esquerdo.
O período de baixa será similar ao que tivo na mencionada lesión, que sufriu nun partido de Copa ante o Almería disputado o pasado mes de outubro.
O Real Club Celta quere trasladarlle todo o seu afecto, apoio e ánimo a Samuel, a quen lle desexa unha pronta e completa recuperación.
Fotografía: Diego Pérez
