O mesmo día en que o dianteiro celeste recolle o Pichichi e o Zarra 2012/2013 nos Premios MARCA
A Liga de Fútbol Profesional celebra mañá pola noite a gala de entrega de premios aos mellores da tempada 2012/2013. Entre os nomeados atópanse dous xogadores celestes, os hispano-brasileiros Rafinha e Charles, que poderían ser galardoados respectivamente como mellor mediocentro e mellor dianteiro da Liga Adelante.
A Gala da LFP, que este ano chega á súa quinta edición, será retransmitida en España a través de TVE e por operadores internacionais de ata 60 países. Ademais, a través da rede social Twitter os afeccionados celtistas poderán seguir en directo a cerimonia e coñecer ao momento se os xogadores célticos resultan premiados. A LFP narrará a entrega de premios ao detalle na súa conta oficial, @lfpnews, e os seguidores poderán participar e informarse mediante o hashtag #premiosfutbol.
Por outra banda, este luns o dianteiro celeste Charles tamén acudirá aos Premios MARCA de Fútbol, que a partir das 13:00 horas entrega os seus galardóns na Sala Roja de los Teatros del Canal (Madrid). Charles subirá ao escenario para recoller o premio Pichichi da Liga Adelante 2012/2013, que o recoñece como o máximo goleador da categoría con 32 dianas, e o trofeo Zarra ao máximo anotador de nacionalidade española.
