Carles Planas compareceu esta mañá en sala de prensa tras o adestramento do primeiro equipo na Madroa. O defensa celeste pediu “facer borrón e conta nova” e volver centrarse na loita por unha praza europea: “Quédannos dez partidos e o obxectivo do equipo é terminar onde merecemos, onde estivemos toda a tempada”, declarou.
O xogador catalán remarcou a importancia do duelo deste fin de semana ante a Real Sociedade, “un rival directo” que coa chegada de Eusebio ao banco “recuperouse tras non comezar ben a tempada”. Planas coincidiu co ex técnico e ex xogador do Celta no filial do FC Barcelona, onde asinaron “tres campañas moi boas”. O lateral zurdo considera a Eusebio “un moi bo adestrador que fixo un gran traballo desde que chegou ao club donostiarra”.
Sobre a lesión do centrocampista céltico Pablo Hernández, quen estará de baixa de 4 a 5 semanas, Carles Planas asegurou que no vestiario sentíronse aliviados ao saber que o seu compañeiro non sofre unha rotura completa do ligamento e que a recuperación será inferior ás peores previsións: “O principal é que se recupere canto antes. É un xogador importante para o equipo”, asegurou.
