O trofeo, de especial valor sentimental para o celtismo, xógase o venres 14 de agosto en Balaídos
O Genoa, da Serie A italiana, será o rival do RC Celta no Trofeo Memorial Quinocho, que este ano chega á súa vixésima edición. O partido terá lugar no estadio de Balaídos o vindeiro venres 14 de agosto ás 20:30h.
Fundado en 1893, o Genoa é un dos históricos de Italia con 1 copa e 9 títulos ligueiros no seu haber, a tan só un campionato de obter a stella coa que o fútbol italiano recoñece aos gañadores de 10 ligas. Actualmente nas súas filas militan soados xogadores como Nicolás Burdisso ou Tomás Rincón.
Tras vencer na pasada edición ao Cagliari por 4 a 0, o Celta vólvese a enfrontar a un rival italiano no Memorial Quinocho, un trofeo cargado de sentimento para o celtismo no que se lembra á figura do inesquecible Joaquín Fernández Santomé ‘Quinocho’, ex xogador e xerente do RC Celta.
