Yoel fixo paradas de gran mérito e Charles e Nolito foron os goleadores celestes
Yoel sostivo ao Celta no tramo inicial do partido e os célticos foron a máis para levar con merecemento a vitoria no Benito Villamarín. Gran segunda metade dos vigueses con goles de Charles e Nolito para sumar o seu primeiro triunfo como visitantes. Rubén Castro acurtou ao final, cando o Celta estaba con dez pola expulsión de Oubiña. Debutou o canteirán David Costas.
Yoel detivo ben ao catro minutos un sorprendente disparo de Verdú nunha falta lateral. O Betis acosaba a balón parado nestes minutos iniciais, pero o conxunto celeste defendeu con solvencia e superou as acometidas locais e ademais nunca renunciaba a saír con velocidade en busca da área rival.
Noutra xogada de estratexia, cabezazo poderoso de Paulao e paradón de Yoel. Ían 13 minutos e o canteirán realizara dúas grandes paradas en xogadas a balón parado, única vía de acceso do cadro sevillano á área celeste.
O Celta buscaba tamén as súas opcións arriba, pero faltáballe precisión no último pase e as súas aproximacións non acababan de asustar a Sara. Augusto cabeceou alto á saída dun córner aos 20 minutos. Tres despois, dobre ocasión para o Betis que acabou nun rexeite e no traveseiro.
A continuación, o Celta desperdiciou de maneira incrible un tres para un. O último pase foi defectuoso cando os célticos tiñan todo a favor para romper o empate. Sara atrapou pouco despois un lanzamento de Toni de falta desde un lateral.
Tramo final tolo: Yoel detivo un man a man a Jorge Molina e Sara un remate de Nolito tras un gran pase de Charles. Era un ida e volta espectacular con ocasións para ambos.
Aos 41 minutos, bo ataque dos vigueses, con gran deixada de Krohn-Dehli cara a Álex López, cuxo disparo, moi potente, saíu elevado. Foi unha primeira metade de moitas alternativas e ocasións, con máis oportunidades para o Betis no tramo inicial, e un Yoel soberbio, e un Celta que aos poucos foi meténdose no choque e tamén dispuxo de claras opcións para marcar.
Tras a continuación, o Celta tomou o mando e chegaba con claridade a zona de perigo. O pau privou a Charles de notar o primeiro gol. Toni centrou desde a esquerda, o ariete celeste rematou e a mera repeleu o coiro. Ían 11 minutos e o partido era do Celta.
Krohn-Dehli, no punto de penalti, errou ante o porteiro tras un pase maxistral de Augusto. O Celta fixera ocasións para ir comodamente por diante no marcador.
Cabral cabeceou fóra tras un saque de esquina nunha nova chegada celeste nunha segunda metade de dominio dos vigueses, que superaban con facilidade a presión local e xeraban perigo de maneira constante.
E aos 21 minutos, chegou por fin o tanto. Gran pase de Nolito cara a Charles e remate coa zurda do ariete á rede. Máis que merecido.
E pouco despois, o segundo. Nolito recibiu no pico da área, amagó e rematou con forza ao primeiro pau. Bo gol para ampliar a vantaxe céltica. Faltaba un cuarto de hora para o final.
Os célticos tiñan o encontro totalmente controlado, con tres centrais nos últimos minutos e o debut do canteirán David Costas, e a superioridade que mostraran na segunda metade fora tremenda.
Oubiña viu unha segunda amarela inxusta a falta de cinco minutos e o Celta encarou o tramo final con dez xogadores. Rubén Castro anotou no último minuto e deu esperanza ao seu equipo, que despois volveu estrelar un remate no pau. Gran triunfo dun gran Celta.
FICHA TÉCNICA
1-R.Betis: Guille Sara, Chica, Paulao, Perquis (Amaya, min.29), Nacho, Matilla, Nosa, Cedrick, Juan Carlos (Rubén Castro, min.69), Verdú e Molina (Chuli, min.59)
2-R.C.Celta: Yoel, Hugo Mallo, Cabral, Fontás, Toni, Oubiña, Álex López (Madinda, min.83), Krohn-Dehli (Rafinha, min.62), Augusto (David Costas, min.77), Nolito e Charles
Goles: 0-1, min.66: Charles; 0-2, min.74: Nolito; 1-2, min.89: Rubén Castro
Árbitro: Prieto Iglesias, do comité navarro. Expulsou a Oubiña con dobre amarelo (min.85) Amonestou a Cedrick, Krohn-Dehli, Hugo Mallo e Rafinha
Campo: Benito Villamarín
