O RC Celta e o CD Lugo pecharon hoxe un acordo para o traspaso dos dereitos federativos do xogador Álvaro Lemos, quen será celeste as próximas cinco tempadas a expensas das pertinentes probas médicas. O acordo foi selado na sede social celeste polos presidentes do Celta, Carlos Mouriño, e do Lugo, Constantino Saqués.
Álvaro Lemos (Santiago de Compostela, 30 de marzo de 1993) é un versátil e veloz xogador de banda que a pasada tempada ofreceu un gran rendemento no lateral dereito do conxunto lucense, onde disputou máis de 1.500 minutos na división de prata. Lemos, futbolista novo e cunha gran proxección, someterase nas próximas horas ás pertinentes probas médicas para, en caso de resultado satisfactorio, asinar o seu contrato e ser presentado co RC Celta.
