O Celta alcanza o parón do Nadal cunha solvente vitoria en Granada e cunha excepcional situación na táboa. Os celestes realizaron un encontro moi serio e foron superaron con claridade a un rival que apenas foi capaz de xerar perigo, Os goles, de Orellana e Iago Aspas, chegaron envolvidos en espléndidas xogadas de ataque.
Partido igualado, sen apenas ocasións e ritmo baixo de xogo… ata que xurdiu a xenialidade en ataque. Gran xogada de Señé, enorme parede con Iago Aspas e cesión do catalán cara a Orellana para que empuxase o balón á rede. Os celestes, xa superiores, acumularon máis ocasións para ampliar a súa vantaxe. Enorme una aos 29 minutos cun centro de Señé que repeleu o traveseiro e caeulle a Bongonda, quen non acertou en primeira instancia e un defensor sacou baixo paus o seu segundo remate.
O encontro gañou en intensidade e disputa no tramo final, que chegou cun novo golazo do conxunto celeste. Gran xogada en ataque pola banda dereita, con varias combinacións, desmarque de ruptura de Jonny, quen, habilitado por un inspiradísimo Señé remonta a liña de fondo e cede á área pequena para que Iago Aspas marcase o segundo. A brillante xogada celeste deu paso de inmediato ao descanso.
Tras a continuación, o Celta controlou o encontro sen problemas, sen pasar ningún tipo de apuro e con boas opcións en ataque, aínda que sen remate. O partido ía avanzando sen sobresaltos, de maneira plácida para un Celta moi ordenado e concentrado, cunha eficaz presión que impedía ao seu rival xerar ocasións. Ao final, merecida vitoria que permite aos vigueses alcanzar o parón na zona alta da táboa.
FICHA TÉCNICA
0-Granada CF: Andrés Fernández, Lombán Biraghi, Fran Rico (El Arabi, min.46), Babin, Javi Márquez (Ibáñez, min.74), Success, Rubén Pérez, Foulquier, Rochina (Uche, min.66) e Peñaranda.
2-RC Celta: Rubén, Jonny, Hugo Mallo, Cabral, Planas, Augusto, Wass, Señé (Pape Cheikh, min.91), Orellana (Sergi Gómez, min.87), Bongonda e Iago Aspas (Guidetti, min.80).
Goles: 0-1, in.20: Orellana; 0-2, min.45: Iago Aspas.
Árbitro: Martínez Munuera, do comité valenciano. Amonestou a Iago Aspas, Planas, Rochina, Success, Rubén Pérez, Uche.
Campo: Los Cármenes.
