Un empate sen goles ante Angola asegúralles matemáticamente unha praza no torneo africano
O canteirán Levy Madinda podería participar na próxima Copa África que comezará en xaneiro tras clasificarse coa selección de Gabón. O empate sen goles cultivado por ‘As Panteras’ o pasado sábado ante Angola, no que Madinda foi titular, foi suficiente para asegurar unha praza no torneo africano, que dará comezo no mes de Xaneiro. O futbolista céltico continúa concentrado coa súa selección, coa que disputará o último partido da fase clasificatoria este mércores ante Lesotho en Libreville, capital de Gabón. Madinda consolidou a súa presenza no combinado gabonés, do que xa é un dos xogadores destacados.
Por outra banda, Orellana e Pablo Hernández finalizaron os seus compromisos coa selección de Chile. Os dous xogadores celestes participaron nos últimos 15 minutos da goleada ante Venezuela (5-0) nun amigable disputado o pasado venres en Santiago de Chile e no que Pablo Hernández pechou o marcador cun tanto de cabeza. O conxunto chileno xogou un segundo amigable onte martes, ante Uruguai, no que Orellana foi titular e Pablo Hernández quedou no banco. O resultado final foi de 1-2 a favor dos charrúas.
Orellana e Pablo Hernández xa viaxan de regreso a Vigo para reincorporarse aos adestramentos do Celta, mentres que a Madinda non se lle espera até o sábado. Outro internacional celeste, Krohn-Dehli, traballa desde comezos da semana co grupo. O danés foi liberado polo seu seleccionador tras o encontro clasificatorio para a Eurocopa ante Serbia no que foi titular e que se saldou cun valioso triunfo 1-3 que mantén aos nórdicos á fronte do seu grupo. Nolito, que debutou onte coa Selección Española en Balaídos ante Alemaña, reincorporouse esta mañá.
