Álvaro Lemos xa é futbolista do RC Celta. O segundo reforzo do club vigués presentouse ante os medios e a afección nun acto celebrado sobre o terreo de xogo de Balaídos. O defensa galego estivo acompañado pola conselleira Carmen Avendaño e polo director deportivo Felipe Miñambres.
Avendaño deu a benvida ao santiagués e, en nome do club, expresou a satisfacción pola súa fichaxe e o desexo de que triunfe como xogador celeste: “Esta é a túa casa”. Pola súa banda Felipe Miñambres sinalou a Lemos como un futbolista que nos últimos tempos experimentou unha gran progresión e do que se espera que siga crecendo como futbolista.
“Veño con moitísimas ganas e ilusión a un gran club, o que considero o primeiro equipo de Galicia, e vou dalo todo por este equipo. Ala Celta!”, declarou Lemos nas súas primeiras verbas como futbolista céltico. O lateral destro foi recibido en Balaídos por un centenar de nenos e nenas dos Campus Fundación Celta, cos que se fotografou tras a presentación.
Os asistentes ao acto, que puideron seguilo desde a bancada de Río, tiveron a oportunidade de coñecelo en persoa e levar a casa balóns do Celta asinados polo galego.
