O internaciónal croata será presentado esta tarde a partir das 18.30 horas no estadio de Balaídos
O centrocampista Danijel Pranjic converteuse no segundo reforzo do Real Club Celta no mercado invernal. O internacional croata chega cedido polo Sporting de Lisboa e o club celeste dispón dunha opción de compra ao final de tempada. Pranjic atesoura unha longa experiencia no fútbol europeo e un espléndido palmarés, xa que, entre outros logros, formou parte da selección do seu país en numerosas ocasións e foi elixido segundo mellor xogador de Holanda.
Pranjic (Croacia, 1981) comezou a despuntar en equipos croatas como o NK Osijek e o Dinamo Zagreb, conxunto co que debutou na Copa da UEFA. En 2005 incorpórase ao Heerenveen holandés, onde xogou catro boas tempadas e participou na consecución do título de Copa 2008-2009.
Desde Holanda dá o salto ao fútbol alemán en 2009 ao fichar polo Bayern Munich, club co que disputou 55 partidos de liga en tres tempadas, ademais de debutar na Champions League. O Bayern pagou polo seu traspaso 8,5 millóns de euros.
En 2012 o Sporting de Lisboa faise cos seus servizos, club do que chega cedido ao Real Club Celta. Como internacional xogou 45 partidos coa selección absoluta de Croacia e participou na UEFA Euro 2008.
Danijel Pranjic será presentado esta tarde ás 18.30 horas na sala de prensa do estadio de Balaídos.
