O equipo afronta o partido deste sábado como clave na loita polos postos europeos. Así o recoñeceu esta mañá o centrocampista céltico Marcelo Díaz, quen asegurou que o persoal adestrou moi ben durante a semana e chegan ao choque preparados para sumar unha vitoria: “Puxemos toda a nosa concentración neste partido. É un rival directo e hai que deixar o tres puntos en casa. Vai ser un lindo espectáculo”, comentou o internacional chileno.
En sintonía co resto do vestiario, Chelo Díaz volveu lembrar que, unha vez asegurada a permanencia, agora o obxectivo é terminar a tempada en postos europeos: “Vía sempre os partidos do Celta e entendía que este equipo merecía xogar unha copa internacional. Agora estou aquí e esa responsabilidade é maior. Adquirimos unha forma de xogar que xera ilusión tanto no cadro de persoal como na xente. Non imos desaproveitar esta oportunidade que temos. Imos seguir pelexando até o final”, asegurou.
“Alégrame que a xente recoñeza o esforzo. Están a valorar o que fago no campo e ponme moi contento. É un incentivo para seguir crecendo e seguir collendo a mellor forma posible”, dixo o xogador que agradece o trato recibido desde o seu primeiro día como celeste tanto polo club como pola afección.
Marcelo non se esqueceu do seu compañeiro Pablo Hernández, lesionado ante o Real Madrid, e recalcou a valiosa achega que o Tucu fai ao equipo: “Hai moitos compañeiros que poden xogar, pero quizais non podemos suplir todas as súas virtudes. É o que hai e só podemos desexarlle ánimos para que teña unha pronta recuperación”, declarou.
