O Dr. Sandoval, especialista maxilofacial do hospital, asegurou “un resultado moi satisfactorio”
O futbolista celeste Carlos Bellvís foi intervido esta mañá da súa fractura no malar dereito no Hospital Vithas Fátima. O doutor García Cota, xefe dos servizos médicos do RC Celta, asegurou que “a intervención foi moi ben. Esta lesión precisaba dun especialista e eliximos a un home da nosa confianza, o Doutor Sandoval”.
Sandoval, responsable da sección de cirurxía maxilofacial do Hospital Vithas Fátima, reafirmou o éxito da operación: “o prognóstico é moi bo. Bellvís tiña un traumatismo directo que lle provocou dúas fracturas”. O Doutor Sandoval destacou o pouco invasiva que resultou a intevención grazas a “un instrumento especial que evitou a intervención directa no óso, cun resultado moi satisfactorio. A fractura está totalmente aliñada sen necesidade de utilizar parafusos de osteosíntesis ou miniplacas”.
Sobre os prazos de recuperación, o Doutor Sandoval indicou que “a fractura necesitará de polo menos corenta días de consolidación. Poderá adestrar con normalidade pero evitando ter moitos contactos”.
