Os afeccionados poderán presenciar a rolda de prensa e a sesión fotográfica desde a bancada de Río
Daniel Wass, segundo reforzo do Celta para a nova tempada, preséntase ante o celtismo este venres ás 12:00h en Balaídos. O internacional danés atenderá aos medios de comunicación sobre o céspede do estadio e a continuación vestirase de curto para pousar ante os medios gráficos co equipamento celeste.
Os afeccionados poderán acceder pola porta 18 á bancada de Río para presenciar un acto que se retransmitirá a través dos videomarcadores e a megafonía do estadio. O evento pecharase cun lanzamento de balóns á bancada asinados polo xogador.
O club convida os celtistas que acudan á presentación a aproveitar a ocasión para xestionar o seu carné nos despachos de billetes do estadio e beneficiarse das vantaxes especiais no último día no que estarán dispoñibles. Ademais, as novas camisetas Adidas xa están á venda na tenda de Balaídos cun 10% de desconto para os abonados que presenten o seu carné en vigor.
