O RC Celta sóbese ao autobús este domingo ás 20:30 na Madroa para desprazarse á Toxa, onde se concentrará durante os próximos días para continuar co traballo de preparación. Os celestes realizaron este sábado a súa última sesión en Vigo, o domingo poderán recargar as pilas e o luns iniciarán unha nova etapa da pretempada, moi esixente, na que as dobres e triplas sesións estarán á orde do día.
Entre o 16 e o 23 de xullo, o equipo celeste combinará traballo no terreo de xogo do Campo de Baltar (Portonovo), con carreira en area e céspede, traballo intenso no ximnasio e un partido -o sábado 21, pendente de confirmación-. A dinámica diaria variará lixeiramente en función do número de sesións programadas para cada día.
Nas xornadas de tripla sesión (adestramento-ximnasio-adestramento), os futbolistas amencerán ás 07:00 da mañá, tomarán unha infusión e poranse en marcha. Non almorzarán ata as 10:00 e, tras tomar a primeira inxesta, continuarán coa preparación física no ximnasio. O plantel comerá ás 14:00 e poderá gozar dun descanso entre as 14:30 e as 17:30, e merendar antes de volver adestrar. O día finalizará coa cea ás 20:30 e o toque de queda ás 23:00. Nas xornadas con dobre sesión, sen ximnasio, os horarios atrasaranse unha hora.
PLAN DE TRABALLO NA TOXA
Luns 16: dobre sesión (actividade en area e terreo de xogo).
Martes 17: tripla sesión (actividade en céspede, ximnasio e terreo de xogo).
Mércores 18: dobre sesión (actividade en area e en terreo de xogo).
Xoves 19: tripla sesión (actividade en céspede, ximnasio e terreo de xogo).
Venres 20: dobre sesión (actividade en terreo de xogo).
Sábado 21: partido.
Domingo 22: dobre sesión (actividade en area e terreo de xogo).
Luns 23: sesión única (actividade en terreo de xogo).
