Renato Tapia foi recoñecido co Premio Estrela Galicia ao Mellor Xogador do mes de xaneiro, grazas ao respaldo da afección celeste nunha votación na que superou a Tasos Douvikas e Vicente Guaita.
O destacado desempeño de Renato ao longo dos 522 minutos disputados neste primeiro mes do ano entre Liga e Copa, sumado ao seu bo traballo defensivo, viuse recompensado co seu segundo Premio Estrela Galicia consecutivo da tempada.
Tapia asegurou que está “moi feliz por recibir de novo este recoñecemento. Son un xogador de equipo, que axuda moitísimo e iso é o que tratei. Moitísimas grazas á xente que o recoñece porque a verdade que estou contento con este premio, pola confianza en min e polo que está a demostrar o equipo”.
Ademais, o 5 celeste tamén quixo facer especial mención ao respaldo da afección. “Estou moi contento de que nos sigan, sobran as palabras de agradecemento. Nos últimos meses formamos un equipo moi unido, melloramos moito e seguirémolo facendo para darlles máis alegrías”, concluíu o defensa.
