O Real Club Celta de Vigo e a súa Fundación traballan con ilusión e intensidade para pór en marcha en varios lugares do continente americano escolas deportivas, algunhas delas cun claro compoñente social, co obxectivo de ampliar fronteiras e estender a imaxe do celtismo. Para iso contará coa colaboración e o apoio de diferentes promotores que se atopan estes días en Vigo para recibir formación e empaparse da metodoloxía de traballo e os valores que se promoven en A Madroa.
Estes coordinadores, co apoio da Fundación Celta porán en marcha ao seu regreso diferentes escolas que buscarán ante todo a formación en valores e o desenvolvemento persoal dos seus participantes en países como México, Arxentina e Estados Unidos. Na tarde de onte visitaron o estadio de Balaídos acompañados polo director da Fundación Celta, Germán Arteta e polo coordinador de escolas e campus, Álex Abalde.
En México, onde o Celta xa está presente en Campeche desde hai máis de dous anos, proxéctase a apertura de dúas novas escolas. A primeira delas será inaugurada en Guadalaxara e terá como coordinadores a Carlos Tarín, Imelda Sarmiento e Rafael López, recoñecidos formadores que se farán cargo do proxecto. Cunha área metropolitana que supera o catro millóns de habitantes, Guadalaxara conta ademais cunha gran tradición futbolística con equipos como o Club Atlas FC onde o actual adestrador celeste Eduardo Berizzo xogou entre 1993 e 1996.
A outra escola mexicana abrirase na localidade costeira de Ciudad del Carmen a cargo de Enrique Morales. Na beira do Golfo de México, esta cidade destaca pola industria petroleira e polo turismo. Tamén está presente no proxecto Humberto Lede, novo coordinador da escola de Campeche.
En Arxentina, a Fundación Celta contará co apoio dos adestradores vigueses Gustavo Souto e Alejandro Calvo para preparar a apertura dunha escola social na cidade de Porto Desexado, unha das localidades máis setentrionais do país, co obxectivo de ofrecer un espazo lúdico e formativo para mozos en risco de exclusión.
Por outra banda, co obxectivo de continuar ampliando fronteiras e co apoio de Jared Vock, a Fundación Celta pretende sondar o mercado norteamericano en busca da localización máis adecuada para fundar a primeira escola do Real Club Celta en Estados Unidos, unha oportunidade para divulgar os valores do celtismo nun país con gran tradición deportiva e un crecente interese polo fútbol.
Ao longo das tres próximas semanas, os técnicos e especialistas do club celeste impartirán diversas formacións co obxectivo de poder trasladar a estas escolas a forma de traballo que levou á canteira do Celta a ser unha das máis recoñecidas a nivel nacional e internacional. Un proceso formativo que se inicia agora, pero que terá continuidade e, do mesmo xeito que se fai cos preparadores na Madroa, será permanentemente revisado e ampliado co fin de lograr os mellores resultados.
Durante a súa estancia, recibirán formación en materia de metodoloxía, proceso de adestramento, psicoloxía deportiva e capacidades condicionais, así como sobre o modelo de xogo que representa e defende o Real Club Celta de Vigo en todas as súas categorías. Ademais, os formadores terán a oportunidade de observar e analizar os adestramentos dos diferentes conxuntos, incluído o primeiro equipo dirixido por Berizzo, quen mostrou desde a súa chegada gran interese polo traballo da canteira celeste.
