Hidetoshi Mori, máis coñecido como “Tosinho”, é un celtista xaponés e socio da peña Celtas do Verdugo que leva as cores do RC Celta no corazón desde a época de Mazinho, o seu ídolo futbolístico. Tras anos desexando visitar Vigo, “Tosinho” por fin coñece a cidade do equipo dos seus amores.
O nipón aterrou esta mañá no aeroporto de Peinador e foi recibido polos compañeiros da súa pena, quen lle fixeron entrega dun agasallo de benvida de parte do RC Celta: unha camiseta asinada por todos os xogadores do primeiro equipo. Os peñistas de Celtas do Verdugo exercerán de anfitrións e durante os próximos días levarán a “Tosinho” a Pontecaldelas e aos principais puntos de interese da cidade olívica.
Ademais o afeccionado xaponés acudirá o mércores ao Estadio de Balaídos convidado polo club celeste para presenciar o partido de Liga ante o Athletic Club, cumprindo así un dos seus maiores soños: ver un partido do RC Celta en Balaídos. O club dálle a benvida e deséxalle unha estancia inesquecible que lle faga sentirse aínda máis orgulloso de formar parte da familia celtista.
