O Real Club Celta amplía unha vez máis a súa estrutura para impulsar o seu crecemento global e reforzar a proxección da entidade. O club contará cunha nova área, a de Mercadotecnia que, baixo a dirección de Maruxa Magdalena Seoane, centrarase no fortalecemento da imaxe e a Marca Celta e na procura, de maneira conxunta con área comercial, de novas fontes de ingresos.
Maruxa Magdalena, quen se incorporará nos próximos días ao club, posúe unha sólida experiencia nos sectores de servizos e distribución, investigación, desenvolvemento e execución de plans de mercadotecnia operativa e plans estratéxicos.
Na súa dilatada traxectoria profesional, destaca o seu traballo como responsable de mercadotecnia no Grupo Plásticos Ferro. Foi ademais Consumer Planning & Research Manager en Diageo, manager de Investigación en España e Portugal en Walt Disney Television International e xefa de Estudos de Audiencia e Análise de Programación en Canle Satélite Dixital.
