O dianteiro moañés, ao que CeltaTV adica un video, despediuse esta mañá do club e da afección
Iago Aspas despediuse esta mañá do Real Club Celta e da afección nunha emotiva rolda de prensa. Acompañado polo presidente Carlos Mouriño, o vicepresidente Pedro Posada e os conselleiros Carmen Avendaño e Antonio Rosendo, o canteirán celeste tivo palabras de agarimo para o club e o celtismo: “a metade do futbolista que son é grazas a esta afección. Seguirei sendo celtista desde a distancia”.
O Real Club Celta quere agradecer a Iago Aspas o esforzo, dedicación, entrega, paixón e fidelidade coas que defendeu o escudo do club durante dezasete anos, ademais de desexarlle o maior dos éxitos na súa nova etapa deportiva.
Iago Aspas chegou ao Celta con tan só oito anos. Tras formarse e curtirse como futbolista nas categorías inferiores, o moañés debutou no estadio de Balaídos nun partido indeleble na memoria céltica. Iago márchase deixando moitos momentos para a historia e un gran sentimento de agarimo nos seus amigos, compañeiros, familiares e seguidores.
Vaise un auténtico xogador da casa, un futbolista que alá onde estea levará con orgullo ao celtismo no seu corazón. Grazas e ata sempre!
