COLABORA COA ESCOLA FUNDACIÓN CELTA INTEGRA AQUÍ
As instalacións deportivas da Madroa enchéronse hoxe de emoción, ilusión e entusiasmo. Foron escenario da posta de longo dun dos proxectos máis importantes e gratificantes emprendidos pola Fundación Celta de Vigo e o RC Celta. O presidente do club, Carlos Mouriño, o director da Fundación celeste, Germán Arteta, e o seu homólogo da canteira céltica, Carlos Hugo, presentaron unha escola de fútbol destinada a mozos con discapacidade intelectual que levará o nome de “Fundación Celta Integra”.
Esta escola, promovida pola Fundación e o club celeste e que será gratuíta para os participantes, pretende servir como unha ferramenta máis no desenvolvemento e integración de persoas con discapacidade intelectual, que terán a posibilidade de practicar este deporte da man do director da canteira celeste, Carlos Hugo.
Durante a presentación, o presidente do Real Club Celta, Carlos Mouriño, manifestou a súa satisfacción ao dar a coñecer esta iniciativa: “Hoxe é un día fermoso para o RC Celta. Gozamos vendo a estes mozos no vestiario onde se lles notaba unha ilusión e un nerviosismo tremendo. Temos tanta ilusión como eles, e non é a dunha persoa no RC Celta, senón a de todos os ámbitos vinculados ao Celta”.
Ademáis, destacou que esta escola é un paso máis no achegamento da entidade celeste na sociedade: “Queremos seguir integrando ao Celta na sociedade e na cidade e reiteramos a idea de que non queremos ser só un equipo de fútbol, queremos ser un club” e terminou agradecendo aos participantes que se unisen a esta iniciativa recalcando que “estaremos orgullosos deles tanto nos éxitos como nos fracasos”.
Pola súa banda, Germán Arteta, director da Fundación Celta de Vigo, sinalou que este é un proxecto cun gran percorrido: “Empezamos con 16 mozos de diferentes asociacións e a idea é seguir crecendo. Asesorámonos por profesionais respecto diso dos seus perfís e de como traballar con eles. A idea é seguir crecendo e a curto ou medio prazo poder competir, pero tamén realizar actividades culturais e de lecer”. Explicou que, aínda que todas as actividades serán gratuítas, creouse un proxecto de crowdfunding ou micromecenazgo na web da Fundación Celta, www.fundacioncelta.com, para obter fondos e colaborar no crecemento desta escola. Cos apoios recibidos a través desta plataforma poderanse organizar novas actividades, así como contar con máis participantes.
Carlos Hugo, quen exercerá de adestrador do equipo, afirmou sentirse afortunado por poder participar no proxecto: “Para min é un agasallo, xa participei en proxectos similares e gocei moito”. O director da canteira céltica contará no seu corpo técnico con Álex Abalde, coordinador das escolas e campus da Fundación Celta, e con Francisco Díaz Fontenla, afeccionado celtista e membro de APAMP (Asociación de Familias de Persoas con Parálise Cerebral) quen se encargará das funcións de delegado, control estatístico e elaboración de informes entre outras.
