O RC Celta lucirá esta tempada novo patrocinador na súa camiseta: Estrela Galicia será o patrocinador principal do club celeste durante os dous próximos anos.
A cervecería da empresa galega en Vigo, situada na Praza de Compostela, albergou este mércores o acto no que Antonio Rosendo, conselleiro céltico, e José Cabanas, director de mercadotecnia de Estrela Galicia, deron o anuncio oficial que estreita aínda máis a colaboración entre ambas as entidades.
O logotipo de Estrela Galicia 0,0 non só aparecerá nas camisetas do primeiro equipo en todas as competicións que dispute, senón tamén nas dos equipos das categorías inferiores celestes.
