O RC Celta, modelo económico na liga española, avanza no seu obxectivo de situarse nos estándares de excelencia coa obtención do Certificado ISO 9001, concedido por AENOR á xestión de calidade do seu departamento de administración e finanzas. Este certificado supón unha nova lombeirada non só á política económica da entidade, completamente saneada e sen débedas tras un duro esforzo e un rigoroso traballo prolongado durante moitos anos, senón á formulación global do club de crecer e mellorar de maneira incesante en cada unha das súas áreas.
Neste caso, o RC Celta volve ser referente no fútbol español ao implantar un sistema de xestión da calidade conforme coa Norma ISO 9001:2015 para as actividades: dirección económica, administrativa e financeira; prestación de servizos administrativos, contables, fiscais, de tesouraría, control interno, e informes da área financeira tanto para consumo interno da alta dirección e as diferentes áreas de negocio do Real Club Celta, así como para consumo externo dos demais grupos de interese, tanto organismos públicos como privados.
Ademais, este logro conta co gran valor engadido de que os procesos de traballo e sistemas de xestión de calidade desenvolvéronse polo persoal que traballa no propio departamento do club, un feito que avala a calidade do equipo humano e o seu nivel de implicación.
A obtención desta certificación é o colofón a unha meritoria xestión de dez anos, cun punto de partida a nivel económico moi complicado e unha situación extrema que se logrou reverter convertendo ao club nun modelo de xestión e calidade.
AENOR
AENOR, a través da certificación e da avaliación da conformidade, contribúe a mellorar a calidade e competitividade das empresas, os seus produtos e servizos. AENOR é a entidade líder en certificación en España, xa que os seus recoñecementos son os máis valorados e atópase entre as 10 principais certificadoras do mundo.
Actualmente, máis de 77.000 centros de traballo teñen algún dos certificados de AENOR, que apoian ás organizacións en campos como a Calidade, Xestión Ambiental, Innovación, Seguridade Laboral ou Responsabilidade Social.
AENOR é unha entidade global, que xa desenvolve operacións en 90 países nas actividades de certificación, formación, servizos de información, inspección, análise, validación e verificación de proxectos de redución de emisións, acompañando ás empresas na súa expansión. En España dispón dunha completa rede de 20 sedes.
