Antonio Chaves, director xeral do RC Celta, participou este xoves nunha conferencia organizada polo Círculo de Empresarios de Galicia dentro do seu programa “Máis que cañas”. O directivo celeste repasou para os asistentes a última década do club, na que o RC Celta logrou unha transformación espectacular que lle levou a vivir actualmente un dos mellores momentos na súa historia.
Chaves subliñou os esforzos do club e de Carlos Mouriño por dotar ao RC Celta de patrimonio propio, unha ambición forxada desde os inicios do seu mandato como presidente celeste co obxectivo de construír unha entidade autosuficiente e competitiva á vez que sólidamente ancorada á cidade de Vigo ante posibles intereses estranxeiros.
Insistiu no empeño da entidade por ancorar o club a Vigo co desenvolvemento de diversos proxectos encamiñados a dotalo de patrimonio e desta maneira evitar a posibilidade dun cambio de sede mediante a compra do club por parte doutras empresas. Puxo como exemplo, como xa fixo o presidente nalgunha ocasión, a posibilidade de que alguén teña un equipo en Segunda División con miras de ascenso a Primeira e o máis fácil sería comprar outro club noutra zona e provocar un cambio de domicilio social. Explicou que esas posibilidades que existen actualmente en España fíxolles reforzar aínda máis a súa idea de dotar ao club de patrimonio e ancoraxes para que nunca o Celta poida abandonar a cidade.
Así mesmo, recalcou que o club se atopa nun momento economicamente forte que lle permitirá afrontar con “afouteza” todos os plans de futuro para Vigo e a súa área metropolitana.
