A pretempada do Celta Xuvenil de División de Honra arrincou a semana pasada. O equipo adestrado por David De Dios afronta este sábado o seu primeiro partido de preparación ante o Deportivo (18:00, Cee) e a próxima semana viaxará a Normandía, en Francia, para participar na prestixiosa La Peronne Cup xunto a grandes clubs do fútbol europeo e mundial.
O Celta, encadrado no Grupo B do torneo con Feyenoord, OGC Nice e Udinese, xogará a fase de grupos na localidade de Verson os días 12 e 13 de agosto. As semifinais xogaranse na tarde do sábado 13 e a gran final o domingo 14. Independentemente dos resultados, todos os conxuntos seguirán competendo en distintos partidos até o último día do torneo.
Palmeiras, Espanyol, Anderlecht, Monaco, Stoke City, Milan, Caen, PSV, Athletic Club, Besiktas, Roma e Olympique Marseille completan a lista de equipos participantes en La Peronne Cup, que se celebra nas localidades normandas de Thaon, Bayeux, Verson e Vire.
O Celta e a súa Fundación continúan fortalecendo e mellorando o proxecto de canteira celeste, sendo a participación dos equipos de categorías inferiores en torneos de alto nivel, como La Peronne Cup, unha das liñas de traballo máis importante. Experiencias como a que vivirán os mozos do Xuvenil Á próxima semana en Francia non só lles permite mellorar deportivamente e probarse ante os mellores equipos do continente, senón tamén progresar no seu desenvolvemento persoal.
