O canteirán celeste e xogador do primeiro equipo Jonny Castro (Vigo, 1994) sumou o pasado sábado ante o Rayo Vallecano o seu partido número cen en Primeira División. O defensor chega á centena de choques na máxima categoría do fútbol español con tan só 21 anos, converténdose no futbolista céltico máis novo en conseguilo na historia do club vigués.
Jonny debutou o 2 de setembro de 2012 ante o Osasuna en Balaídos. Desde entón consolidouse no primeiro equipo, na Selección Española Sub-21 e incluso foi convocado por Del Bosque para participar en adestramentos coa absoluta.
