Iago Aspas, con dous tantos, Pablo Hernández e Guidetti foron os goleadores celestes (4-0)
O Celta adxudicouse de maneira brillante o XX Memorial Quinocho tras golear ao Genoa con 2 tantos de Iago Aspas, Pablo Hernández e Guidetti. Os celestes foron moi superiores ao seu rival nun partido que decaeu na segunda metade.
O Celta tardou 4 minutos en atopar precisión e velocidade no pase para superar á defensa do Genoa. Varios pases desde fóra cara a dentro ata que o coiro chegou ao Tucu Hernández na área pequena para que a media punta celeste empuxase o coiro á rede.
O conxunto celeste dominaba o partido con autoridade, movendo o coiro sen erros e sen permitir a máis mínima alegría ofensiva ao rival. Aos 17 minutos, Aspas anotou o segundo tanto dun Celta moi superior.
Aos minutos 24, nova exhibición de velocidade e pegada. Cambio de xogo de Orellana cara a Nolito, control maxistral e envío cara a Iago Aspas, quen aloxou o coiro na rede cun bo zurdazo.
A vantaxe puido ser maior á media hora de xogo tras outra boa contra con pase de Iago Aspas a Nolito, cuxo remate desde a frontal rozou a escuadra dereita de Lamanna. O Celta xogaba con brillantez e superaba con claridade a un impotente Genoa. O descanso chegou con esa rotunda vantaxe céltica, e unhas excelentes sensacións.
Tras a continuación, o Celta mantivo o seu dominio, aínda que o ritmo de xogo decrecera. Aos 21 minutos Gudetti, que acababa de entrar, anotou o cuarto tras unha gran asistencia de Orellana.
FICHA TÉCNICA
4-R.C.Celta: Rubén, Hugo Mallo (Planas, min.82), Sergi Gómez, Fontás, Jonny, Augusto, Wass (Radoja, min.70), Orellana (Bongonda, min.78), Pablo Hernández (Guidetti, min.65), Nolito (Drazic, min.70) e Iago Aspas (Señé, min.82).
0-Genoa F.C.: Lamanna, De Maio (Muñoz, min.52), Burdisso, Perotti (izzo, min.42), Marchese (Rincón, min.52), Tino Costa (Ntcham, min.70), Pandev, Lazovic (Panico, min.78), Kuco (Tachtsidis, min.73), Cissokho e Laxalt.
Goles: 1.0, min.4: Pablo Hernández; 2-0, min.17: Iago Aspas; 3-0, min.24: Iago Aspas; 4-0, min.66: Guidetti.
Árbitro: Vicandi Garrido, do comité vasco. Amonestou a Rincón, Kuco.
Campo: Balaídos, 9.171 espectadores. Antes do comezo do partido presentáronse os distintos equipos celestes e gardouse un minuto de silencio en memoria do piloto Dani Rivas e do familiar do xogador céltico Gustavo Cabral, Agustín Miranda.
