O primeiro partido da pretempada en Balaídos disputarase o sábado 16 de agosto
O Cagliari Calcio, da Serie A italiana, será o rival do RC Celta no XIX Memorial Quinocho, trofeo estival de especial significado para a familia celtista.
A tradicional homenaxe ao inesquecible ex xerente do club disputarase o sábado 16 de agosto en Balaídos co histórico conxunto italiano como convidado. A afección celeste terá a oportunidade de comprobar a evolución dos de Berizzo a poucos días de comezar a liga e ante un adversario de peso.
O Cagliari, que alberga nas súas vitrinas un trofeo de campión da Serie A, conta nas súas filas co dianteiro Mauricio Pinilla, ex xogador celeste que recentemente disputou os oitavos de final da Copa do Mundo coa selección de Chile.
