A entrega dos afeccionados, espectacular, resultou decisiva e empuxou ao equipo cara a vitoria
O Real Club Celta quere agradecer e felicitar ao celtismo polo seu apoio inconmensurable durante o partido de Copa en Balaídos ante o Real Madrid. A entrega dos afeccionados celestes, espectacular desde antes do comezo do encontro e até o asubío final, resultou decisiva e empuxou aos xogadores cara á vitoria.
O respaldo total ás iniciativas do club de corear a aliñación e cantar o himno “a cappella” á saída dos xogadores, permitiu que o estadio de Balaídos vivise un ambiente máxico que debe ter continuidade nos próximos choques, xa que o alento da afección e a súa comuñón co equipo serán fundamentais para alcanzar os obxectivos desta tempada.