Un dobrete de Tasos Douvikas ao Sestao River clasifica ao RC Celta para a terceira rolda da Copa do Rey (1-2). O dianteiro grego abriu e pechou o marcador cun tanto no minuto 17′ e un penalti no 78′ que outorgou aos celestes o billete a dezaseisavos de final.
O partido iniciouse con dous equipos estratexicamente situados que competían pola posesión do esférico. As forzas entre RC Celta e Sestao River parecían neutralizarse, facendo que ningún mostrase unha superioridade tanxible, ata que no minuto 17 produciuse o primeiro momento destacado do xogo: un gol de Tasos Douvikas. O dianteiro grego, tras un pase longo de Miguel Rodríguez, aproveitou a situación para superar en velocidade ao seu opoñente e definir con precisión no man a man contra Pere Joan (1-0).
Durante a segunda metade, os de Rafa Benítez impuxéronse ás dificultades do terreo e da climatoloxía para crear varias ocasións perigosas. A máis destacada, un tiro de Ristic que terminou topándose coas mans do gardameta vasco. Ante o intento celeste de poñer terra polo medio, o Sestao reaccionou, plantouse na área contraria e subiu o 1-1 ao luminoso. Faríao grazas a un centro de Aranzabe que se coou, tras un desafortunado rexeite de Unai Núñez, na portería de Marchesín.
De novo con táboas no marcador, todo podía pasar. Con todo, un penalti de Álvaro Mateo a Kevin Vázquez no minuto 78′ inclinou a balanza. Douvikas, encargado de tirar desde os once metros, trasnformó aquela pena máxima no 1-2 definitivo que clasificou aos celestes para a seguinte rolda de Copa do Rey.
O sorteo para determinar os enfrontamentos dos dezaseisavos de final da Copa do Rey levará a cabo o martes 12 de decembro ás 13:00 h. Mentres tanto en Liga, a próxima cita do RC Celta será o luns 11 de decembro ás 21:00 h en Vallecas, onde se enfrontará ao Rayo Vallecano na décimo sexta xornada da competición.
FICHA TÉCNICA
1 – Sestao River Club: Pere Joan; Markel Etxebarria (Asier del Río, min.90), Mirapeix, Gaizka Martínez, Álvaro Mateo (Mario Camero, min.80); Carbonell (Jon Cabo, min.46), Armando Corbalán, Gete (Kepa Uriarte, min.65), Aranzabe; Jon Guruzeta (Ibai Sanz, min.80) e Leandro.
2 – RC Celta: Marchesín; Kevin, Starfelt, Unai Núñez, Ristic; Miguel Rodríguez (Carles Pérez, min.65), Dotor, Beltrán, Cervi (Tapia, min.88); Williot Swedberg (De la Torre, min.83) e Douvikas (Larsen, min.88).
Goles: 0-1, min.17: Douvikas. 1-1, min.73: Unai Núñez (propia meta). 1-2, min.78: Douvikas (penalti).
Árbitro: Pablo González Fuertes (Comité Asturiano). Cartón amarelo aos locais Gete (min.10), Mateo (min.77) e Pere Joan (min.77), e ao visitante Miguel Rodríguez (min.42).
Incidencias: Partido da segunda rolda da Copa del Rey, disputado en Las Llanas ante uns 3700 espectadores.
