O RC Celta continúa traballando na mellora constante da atención aos seus abonados e afeccionados e para o primeiro partido da tempada do Centenario en Abanca Balaídos, ante Osasuna este domingo ás 17:00 horas, estrea un novo servizo para solventar incidencias na recepción dos carnés.
O club xa depositou para o seu envío a totalidade dos carnés de abonado e os que non o recibiron terano no seu domicilio nos próximos días. En calquera caso, o RC Celta pon en marcha esta tempada o carné dixital, que estará dispoñible no portal de abonados, abonados.rccelta.es, para que poida ser utilizado en caso de incidencias. Este novo servizo para o abonado celtista permitirá solucionar para este encontro posibles atrasos ou extravíos no envío dos carnés e así evitar desprazamentos aos despachos de billetes do estadio.
O club recomenda aos abonados que ao tratarse dun novo servizo que se atopa na súa fase inicial sigan utilizando o seu carné físico, xa que se trata da vía de acceso máis operativa e rápida. No caso de que haxa necesidade de utilizar o abono dixital, o club aconsella aos seus abonados que acudan ás portas de acceso polo menos con 30 minutos de antelación sobre a hora de comezo do partido.
O abono dixital non estará operativo para os abonados de Marcador Alto, que para os dous primeiros partidos recibirán a súa entrada, nin para os Miudiños. En caso que algún carné de Miudiño non se recibise antes do venres ás 14h. deberán escribir un correo a abonados@rccelta.es para facilitarlles outra alternativa.
