O primeiro partido na historia do RC Celta en Estados Unidos saldouse con empate e, como non, con Iago Aspas como goleador. O equipo de Chacho Coudet igualou (1-1) a San José Earthquakes, equipo histórico da MLS, no PayPal Arena.
Foi un encontro propio de pretemporada, co ritmo axustado á carga de traballo e a escaseza de sesións de preparación, coas probas de posicionamento, os axustes na presión, os cambios masivos… O RC Celta dominou na primeira metade e levou o seu bo rendemento ao marcador no minuto 38 cun tanto de penalti de Iago Aspas tras unha clara derriba na área a Miguel Baeza.
O conxunto estadounidense empatou pouco despois nun saque de esquina cun cabezazo de López. Ese gol temperou o choque, que na segunda metade transcorreu máis plano e afastado das áreas. Houbo espazo, iso si, para outro detalle de Iago Aspas, unha falta rasa executada con mestría que acabou con o coiro no pau. E houbo tempo para o debut do terceiro dos fichaxes que participou na histórica xira: Luca da Torre disputou os seus primeiros minutos como celeste.
