‘Volver’ con prezos de hai catro anos: a campaña de abonados 2021/22 arranca o 2 de agosto. 

A campaña de abonados do RC Celta para a tempada 2021/22 preséntase cunha soa palabra, pero recolle un aluvión de emocións e sentimentos: “volver”. Tras unha campaña, a anterior, de doloroso silencio, ausencia e distancia, a afección celeste volverá ao estadio de Abanca Balaídos para darlle vida ao equipo.

Este luns 2 de agosto comeza unha campaña na que se manteñen os prezos, exactamente os mesmos que na tempada 2017/18. Catro anos xa sen subidas. Ademais, todos os abonados actuais gozarán dun desconto especial de 50 euros. Os abonados que dispoñan de moedeiro dixital tamén se lle descontará a cantidade dispoñible nese soporte.

A campaña concluirá o día 11 de agosto, uns días antes do comezo da competición, que arrincará en Abanca Balaídos cun apaixonante RC Celta-Atlético de Madrid. Debido ás limitacións de capacidade por mor das obras no estadio, non se tramitarán altas ata que finalice a campaña de renovación de abonos.

Consulta o prezo da túa renovación a continuación, ao que terás que restarlle os 50€ de desconto especial. Tamén podes descargar o dossier da campaña con toda a información sobre condicións, proceso de renovación online, dúbidas sobre moedeiro, etc.

Chegou o momento de volver a casa!